وفاء مكي : أنا فتاة أحلام جيل كامل .. وتبكي بسبب هشام سليم
حلت الفنانة وفاء مكي، ضيفة على الإعلامية ياسمين عز ببرنامج ” كلام الناس” والمذاع عبر قناة ” إم بي سي مصر”.
وكشفت الفنانة وفاء مكي عن استيائها مما حدث تجاه الفنان هشام سليم على مواقع التواصل الاجتماعي في أيامه الأخيرة.
وفاء مكي رفضت العمل مع محمد رمضان بسبب المال
كشفت الفنانة المصرية، وفاء مكي، رفضها المشاركة في فيلم “على الزيرو” من بطولة نيللي كريم ومحمد رمضان.
وأوضحت خلال حوارها مع الإعلامية ياسمين عز ، مساء أمس الخميس أنها رفضت المشاركة في الفيلم بسبب ضعف المقابل المادي مقارنة مع تاريخها الفني.
كما قالت: “كلمني مدير الإنتاج، وكان المفروض شغلي كله في المطار مع صلاح عبد الله، قلت له نتكلم والحاجات دي”، في إشارة منها إلى التفاوض على الأجر.
فتاة أحلام جيل كامل
وخلال اللقاء، كشفت عن أحد أسرار حياتها قائلة إنها كانت “في وقت من الأوقات فتاة أحلام جيل بكامله. وقالت”كان فيه واحد بيجيلي كل يوم تحت البيت، وكنت بخاف أفتح الباب بسببه”.
كما أكدت أنه لم يكن مصريا بل كان مليارديرا عربيا”، مضيفة: “ناس كثيرة طلبوا مني أسيب الفن علشان أتجوزهم”.
وفاء مكي تبكي بسبب هشام سليم
قالت “مكي”: ” عارفة قعدنا نصور الراية البيضا فترة طويلة، سافرنا مع بعض وعشنا مع بعض، ما بين القاهرة والإسكندرية والأردن، وشفت قد إيه أخلاقه جميلة، وبني آدم جميل وكويس، ومن جواه في حاله، مآذاش حد، كان عنده حاجة حلوة بيعملها، ومعندوش لن يعملها”.
وأضافت: ” زعلانة عشان البهدلة اللي في الآخر، حرام، ليه كده؟، يعني وصلني تعليق، شوية هينزلوا معاه القبر وهو بيتحاسب، وابنه ومش ابنه، يا جماعة أحنا في إيه ولا في إيه؟، وكنت قريبة منه وعارفه قد إيه هو إنسان وجدع، ويعمل حاجات كتير خير وحلوة قوي، من غير ما حد يشعر بيها، صعبان عليا، ربنا يرحمه يارب”.
واستكملت: “الرحمة، الرحمة حلوة قوي، وده موت له حرمته وله هيبته، وده بس اللي حاسس فيها، وصلت لمرحلة السوشيال ميديا مليش علاقة بيها خالص، بحس إنها بتضر أكتر ما بتنقع، بتنتهك حرمات الناس، بتتدخل في أدق التفاصيل ومن غير ما حد يعرف حاجة، كل ده عشان يعملوا نسبة مشاهدة، طب وليه؟، حرام، ربنا هيسألك الفلوس دي، أنت تعرف حاجة عن وفاء؟، عشان تتكلم في خصوصياتهم”.
يذكر أن الفنان هشام سليم رحل عن عالمنا عن عمر يناهز 64 عاما بعد صراع مع مرض سرطان الرئة.
تعليق ناري لوفاء مكي عن الحجاب
كشفت الفنانة وفاء مكي سبب ظهورها بالحجاب في أحد البرامج، مؤكدة: “الحجاب لا عيب ولا سُبه”.
وأوضحت: “كنت في برنامج ديني وكنا بنصور في مصر الجديدة وقعدت أدور على إيشارب لأنهم قالولي لازم حجاب عشان فيه شيخ وقرآن وقعدت ألف بالعربية لحد ما اشتريت حجاب؛ احتراما لهيبة الشيخ”.
مش عيب ولا حرام
وأكدت: “الشيخ طلب مني ألبس إيشارب احتراما للحديث والقرآن”، مردفة: “أنا لم أتحجب مش عيب ولا حرام ولا قلة أدب، لكن أنا لم أتحجب”.
الندم الأكبر في حياتها
وأعربت عن ندمها لعدم زواجها واهتمامها بالفن، مؤكدة أنها لو عاد بها الزمن كانت ستتزوج بعد وفاة زوجها، موضحة: “أنا غلطت بس ملقتش حد يوعيني وأنا كنت مغيبة لدرجة مش بفتكر عملت كام عمل والعمر سرقني والرجالة كانوا بيتخانقوا عليا ولحقت أجيب عيل قبل القطر ما يفوتني”.
وفاء مكي تتحدث لأول مرة عن سجنها
يشار إلى أن وفاء مكي تألقت خلال التسعينيات في عدة مسلسلات أبرزها ذئاب الجبل، لكن في عام 2001 تم الحكم عليها بالسجن 10 سنوات مع الشغل والنفاذ، لإدانتها بتهمة تعذيب خادمتيها مروة وهنادي عبد الحميد والاعتداء عليهما، وتم تخفيف الحكم بعدها إلى 3 سنوات لتخرج من السجن في عام 2004.
تحدثت الفنانة وفاء مكي، أزمة سجنها بتهمة تعذيب خادمتين، قائلة: “لكل جواد كبوة ولا بد من أن الحياة تعلمك لكي تتمكني من الوقوف على قدمك لكي تكوني إنسانة قوية”.
وأضافت: “الله له حكمة في ما حدث”، لافتة: “عندي خادمات بيساعدوني دلوقتي في البيت، والحكاية دي بقالها 20 سنة وأكثر”.
وأشارت: “التكنولوجيا حاليا جعلت الناس تفهم الموضوعات بطريقة سريعة وسهلة، ولما حد بيتكلم بقوله دا موضوع ملهوش لازمة ولما بفتكر بقول إيه التهريج دا؟ وبضحك، ولكني اقتنعت أن اللي حصلي له حكمة يعلمها الله والضربة اللي مش بتقتل بتقوي”.